ciseán
CISEÁN SIOPADÓIREACHTA
Tá do chiseán siopadóireachta folamh.
Jackie Mac Donncha
Nóta beathaisnéise
Saothair foilsithe

Cainteoir dúchais Gaeilge is ea Jackie Mac Donncha a rugadh i gCill Chiaráin, Conamara in 1946. Ba as Cill Chiaráin dá mháthair agus ba as an gceantar céanna dá athair. Chaith Séamas Ennis tamall le muintir athair Jackie ag bailiú béaloidis agus ceoil; léiriú is ea é sin ar an timpeallacht léinn dúchais inar fhás sé aníos.

Is in 1990 a chuaigh sé i mbun scríbhneoireachta den chéad uair le linn dó a bheith ag baile. Is mar chaitheamh aimsire a tharraing sé an scríbhneoireacht chuige i dtús ama, ach níorbh fhada gur léir go raibh bua ar leith aige. D’fhoilsigh Cló Iar-Chonnachta a chéad chnuasach filíochta Gaineamh Séidte (Cló Iar-Chonnachta, 2003) sa bhliain 2003. Agus an Dr Gearóid Denvir ag labhairt faoi Mhac Donncha, dúirt sé: ‘file fuinte, forbartha, lánfhileata é’. Bhain gearrscéal dá chuid an phríomhdhuais amach sa chomórtas nuascéalaíochta a d’eagraigh an páipéar, Foinse. Tá an scéal sin, agus scéalta eile, foilsithe ag Cló Iar-Chonnachta sa leabhar Nuascéalta (Cló Iar-Chonnachta, 2005). Anuas orthu seo, bíonn Jackie ag scríobh amhrán agus geamaireachtaí.

Bhain an beochan, Cúilín Dualach (Cartoon Saloon) atá bunaithe ar ghearrscéal dá chuid, gradam I.F.T.A. amach in 2005. Ba iad Cartoon Saloon, as Cill Chainnigh, a rinne an anamúlacht, agus léiríodh i gcomhar le Sonta é. Rinne TG4 agus Bord Scannán na hÉireann urraíocht air, faoi scéim Oscailt TG4. Anuas air seo, bhain sé gradaim eile ag féilte idirnaisiúnta san Iodáil, an Spáinn, agus gradam ag Féile na Scannán Ceilteach sa Bhreatain Bheag in 2006 freisin. Tá riar mhaith duaiseanna eile bainte aige ag an Oireachtas dá fhilíocht, dá phrós agus dá aistí.

Oibríonn sé mar áisitheóir le dhá mheánscoil ina cheantar féin, áit a dtugann sé ceardlanna sa scríbhneoireacht chruthaitheach do na daltaí.

Nuashonraithe Iúil 2013

Filíocht

Bróga Johnny Thomáis (Cló-Iar Chonnachta, 2012)

Gaineamh Séidte (Cló-Iar Chonnachta, 2003)

Prose

Ailleach (Cló Iar-Chonnachta, 2010)

Nuascéalta (Cló Iar-Chonnachta, 2005) [Arna fhoilsiú i gcomhar le Foinse]

Eolas faoi Cois Life · Sonraí teagmhála